Ачасене парне савăнăç кÿчĕ («Пурнăç çулĕпе»)

Тин кăна иртсе кайрĕç-ха Çĕнĕ çул уявĕсем. Анчах та ачасен чунĕсенче асамлăх туйăмĕ çав-çавах сÿрĕлмен. Вĕсем пурнăçа кĕреймен ĕмĕчĕсем пурнăçланасса та шанса пурăнаççĕ. Эппин, вĕсен шухăш-тĕллевĕ патне çывхаракан çулне çывăхлатмалла. Унсăр пуçне пĕчĕк савăнăç парнелени те вĕсемшĕн пĕлтерĕшлĕ.   

Акă Ураскилтри «Асамат кĕперĕ» ача садне çÿрекенсемшĕн Çĕнĕ çул уявĕ малалла тăсăлчĕ темелле. Ачалăх телейлĕ пултăр тесе тăрăшмалла, яланах пĕчĕкскерсене хавхалантармалла. Çавăнпа та Чăвашпотребсоюз çулсеренех ятарлă проект йĕркелет. Унпа килĕшÿллĕн Элĕк райповĕ тата «Единая Россия» парти кăçал та пĕрлехи проекта манăçа хăвармарĕç. Нумай ачаллă тата йывăр лару-тăрура, пĕчĕк тупăшлă çемьере пурăнакан ачасене валли «Ачасене - шăккалат» акци йĕркелерĕ. Унта районти потребительсен обществин тытăмĕнчи магазинсем хутшăннă.

Çак акци вăхăтĕнче пуçтарăннă пылак çимĕçе Ураскилт вăтам шкулĕ çумĕнчи ача садне çÿрекенсене парса савăнтарма шутланă. Кунта 40 ытла ача çÿрет. Вĕсем Юр Пикепе пĕрле Çĕнĕ çул юррисене, ташшисене тепĕр хут аса илчĕç. Пĕчĕкскерсем тĕрлĕ капăр тум тăхăнса килнĕ. Савăнăçпа тулнă музыка залĕ часах пурне те уява чĕнчĕ. Кĕтнĕ хăнасем ачасен пултарулăхне сăнаса кăмăлĕсене хăпартрĕç. Чи пĕчĕккисем те ыттисемпе пĕрле ташша тухрĕç.

Уява килнĕ ачасене, ашшĕ-амăшне тата воспитательсене вара Элĕк райповĕн правленийĕн председателĕн тивĕçĕсене пурнăçлакан Антонина Чугунова саламларĕ. Вăл пĕчĕкскерсене пурнăçра сутуçă профессине суйласа илме хăраса тăмалла марри çинчен каларĕ. Ачасем хаваспах калаçăва хутшăнчĕç. Хăйсем пурăнакан ялсенчи магазинсенче сутуçăра ĕçлекенсен ячĕсене те аса илчĕç. Унтан Антонина Васильевна Юр Пикепе пĕрле уява пуçтарăннă кашни ачана шăккалатсем валеçсе пачĕ. Унсăр пуçне тĕрлĕ кучченеç те кĕтрĕ хăйĕн пĕчĕк хуçисене.

Çакна та палăртас килет. Çулсеренех ирттерекен акци малашне те ĕçлетĕрччĕ.  Уйрăмах тимлĕхсĕр юлнă тата йывăр лару-тăрури ачасем патне те çитсе парнесемпе савăнтартăрччĕ.

"Пурнăç çулĕпе"

Анжелика СИЛИВЕСТРОВА.