ÇАМРĂК ПЕДАГОГСЕМ ПАТШАЛĂХ ДУМИНЧЕ ПУЛНĂ («Пурнăç çулĕпе»)
Раççей Федерацийĕнчи вĕренÿпе наука ĕçченĕсен Профсоюзĕн Чăваш Республикинчи уйрăмĕ Чăваш Енри çамрăк педагогсен Канашĕпе пĕрле сахал мар ĕç туса ирттереççĕ. Педагог профессине суйласа илнĕ каччăсемпе хĕрсене кулленхи ĕçре сиксе тухакан йывăрлăхсене çĕнтерсе пыма пулăшас тĕлĕшпе тĕрлĕ мероприяти йĕркелеççĕ. Çак ĕçре республикăри районсенче йĕркеленнĕ çамрăк педагогсен Канашĕсем те пысăк вырăн йышăнаççĕ. Республика шайĕнче вĕсене валли тĕрлĕ конкурс йĕркелени те пĕлтерĕшлĕ пулнине палăртаççĕ вĕрентекенсем. Шкулсенче нумаях пулмасть педагогика стажне çырма пуçланă вĕрентекенсем хушшинче «Пĕтĕм Раççейри педагогсен шкулĕ», «Хĕллехи шкул», «Таир» регионсем хушшинчи форумра, педагогсен пултарулăхне палăртакан «Педагогсен дебючĕ» республикăри тата Пĕтĕм Раççейри шайра çĕнтерÿçĕсемпе лауреатсем пулса тăнисен йышĕнче Элĕксем пурри те савăнтарать.
Районти çамрăк педагогсен Ассоциацийĕн председателĕ, Вутланти пĕтĕмĕшле пĕлÿ паракан тĕп шкулта историпе обществознани предмечĕсене ертсе пыракан Александр Николаев палăртнă тăрăх, тĕрлĕ мероприяти кăтартăвĕсемпе малтисен ретĕнче Элĕксем. Çакна тĕпе хурса ĕнтĕ Александр Алексеевич тата асăннă Ассоциаци председателĕн çумĕ, И.Я.Яковлев ячĕллĕ Элĕкри вăтам шкулта географи предметне вĕрентекен Ангелина Викторова республикăри ытти районсенчи çамрăк педагогсемпе пĕрле январĕн 15-17-мĕшĕсенче РФ Патшалăх Думин 7-мĕш созыври депутачĕпе Алена Аршиновăпа тĕл пулма Мускава кайма тивĕçнĕ те.
- «Космос» гостиницăна вырнаçтарчĕç Чăваш Республикинчен кайнă 38 çынран тăракан делегацие. Останкинăри телебашня, Ял хуçалăх çитĕнĕвĕсен куравĕн территорийĕ, Вера Мухинăн «Рабочипе колхозница» скульптури, космонавтсен паркĕ ал тупанĕ çинчи пекех курăнатчĕ, - каласа парать А.Николаев. РФ Патшалăх Думин çурчĕ патĕнче педагогсемпе Етĕрне районĕнчи пĕр шкулти ачасен ушкăнне А.И.Аршиновăн пулăшаканĕ Родион Калинкин кĕтсе илнĕ. Алена Игоревна ĕçрен вăхăтлăха пушаниччен Чăваш Енри ушкăн Патшалăх Думин çурчĕпе паллашнă. Вĕрентекенсем тĕрлĕ парти депутачĕсен, Патшалăх Думин ларăвĕсене ирттермелли залсене кĕрсе курнă. Массăллă информаци хатĕрĕсен представителĕсен ĕç зонисемпе, Алена Аршиновăн ĕç пÿлĕмĕпе паллашнă, сăн ÿкерĕннĕ.
- Январĕн 16-мĕшĕнче 12 сехетрен пуçласа 13 сехетчен Алена Игоревна Чăваш Республикинчен килнĕ педагогсемпе курнăçма вăхăт тупрĕ. Хăйне евĕрлĕ тĕлпулу РФ Патшалăх Думин Вĕренÿпе наука енĕпе ĕçлекен Комитетăн лару залĕнче иртрĕ. Яланхиллех йăл кулса, ăшă кăмăлпа пырса кĕчĕ пÿлĕме депутат. Ăна курсан пирĕн пăлхану туйăмĕ тĕ сĕвĕрĕлчĕ. Вăхăта тăсмасăрах вĕренÿ тытăмĕнче пăшăрхантаракан ыйтусем тавра калаçу пуçланчĕ, - сăмахне пуçарать Элĕкри вăтам шкулта ĕçлекен çамрăк педагог Ангелина Вячеславовна.
Вĕрентекенсем депутата шкулсенче тăтăшах тĕрĕслевсем ирттерни педагогсене вĕренÿпе воспитани парас ĕçре чăрмав кÿнине палăртнă.
Асăннă ыйту çине хуравланă май Алена Аршинова депутатсем ку тĕлĕшпе моратори йышăннине пĕлтернĕ. Çавна май çитес тапхăрта ку енĕпе лару-тăру улшăнассине каланă.
- Çавăн пекех тĕлпулура класс ертÿçи пулнипе çыхăннă тÿлев çинчен те сăмах хускатрĕç. Паян класс ертÿçине тÿлекен виçе вăл çак ĕçе пурнăçлама тăкакланă вăй-хала пачах та саплаштарманнине каларăмăр. Педагогсен çак ыйтăвĕ çине хуравланă май депутат çĕршывăн пысăк хулисенчи вĕренÿ учрежденийĕсенче воспитани ĕçне предметсене вĕрентекен педагогсем пурнăçламаннине асăнчĕ. Ку ĕçе йĕркелесе пыма ятарлă вĕрентекенсене явăçтарнине пĕлтерчĕ. Çак практикăна депутатсем регионсенчи шкулсенче те ĕçе кĕртме сĕнеççĕ. Чăваш Республикинчи класс ертÿçисен тÿлевĕпе çыхăннă ыйтăва пăхса тухса татса пама шантарчĕ, - тĕлпулура сÿтсе явнă тĕп ыйтусем çинче чарăнса тăчĕ районти çамрăк педагогсен пĕрлĕхĕн председателĕ.
Чăваш Енри вĕрентекенсем учитель ят-сумне ÿстерес ыйтăва та тимлĕхсĕр хăварман. Çак ыйтăва вара тивĕçлĕ шалусăр татса пама май çуккине пĕлтернĕ. Паянхи куна учителе мĕнле ĕç укçи парассине кашни регион хăй палăртать. Депутатсем, вăл шутра А.Аршинова та, кунпа килĕшмест. Çавăнпа та вĕренÿпе наука енĕпе ĕçлекен Комитет ку енĕпе лару-тăрăва лайăхлатас сĕнÿсемпе пĕрре мар тухнă. Депутатсем те ку пуçарăва йышăнаççĕ, юлашки пăнчăна профильлĕ министерствăн лартмалла.
Вăхăт сахал пулнăран хăйсене пăшăрхантаракан пĕтĕм ыйтăвах хускатма май килмен-ха Чăваш Енри педагогсен. Патшалăх Думинче тĕлпулу вĕçленнĕ хыççăн Мускаври паллă вырăнсене çитсе курнă вĕрентекенсем.
Эльвира КУЗЬМИНА.
«Пурнăç çулĕпе»
