ПĔТĔМ РАÇÇЕЙРИ АКЦИРЕ ÇĔНТЕРНĔ («Пурнăç çулĕпе»)

 «Единая Россия» партин Чăваш регион уйрăмĕн ĕçтăвкомĕнче «Пирĕн геройсем» Пĕтĕм Раççейри акцин çĕнтерÿçисем хăйсем тивĕçнĕ наградăсене илнĕ. Чыслав йăли-йĕркине Патшалăх Думин депутачĕ, «Единая Россия» политика партийĕн фракцийĕн членĕ Леонид Черкесов, «Пĕрле тăватпăр» Пĕтĕм Раççейри юхăмăн штабĕн регион ертÿçи, Шупашкар хула депутачĕсен Пухăвĕн депутачĕ, ООО «НПО Экологи» директорĕ Сергей Лебедев уçнă. Леонид Черкесов çамрăк лидерсене тата вĕсен кураторĕсене конкурсра пысăк çитĕнÿ тунă ятпа саламланă. Аса илтеретпĕр, «Сывă пуласлăх» парти проекчĕпе тата «Пĕрле тăватпăр» Пĕтĕм Раççейри юхăмпа килĕшÿллĕн 2018 çулти апрель-июнь уйăхĕсенче «Пирĕн геройсем», «Шыв тата сывлăх» акцисем иртнĕ. Вĕсем Раççей Федерацийĕн 80 субъектĕнчи 16 пине яхăн вĕренÿ учрежденине пĕрлештернĕ. Чăваш Ен Акци лидерĕсен отчечĕсене тăратнин шучĕпе 7-мĕш вырăн йышăннă. Пирĕн республикăран пурĕ 376 вăтам вĕренÿ учрежденийĕ хутшăннă. Çакă, 2017 çулхипе танлаштарсан, 50 процент ытларах. 534 лидер акцие 30 пин шкул ачине тата педагога явăçтарнă. 877 урок, экологи тата патриотизм çул-йĕрĕпе пиншер ытла мероприяти ирттернĕ.  Икĕ конкурс кăтартăвĕсем тăрăх Чăваш Енри 15 шкул ачине «Артек» лагере кайма тÿлевсĕр путевка парса чысланă. Ачасем Раççейри чи лайăх лидерсем хушшинче сменăна питĕ аван ирттернĕ. Вĕсен йышĕнче пирĕн вĕренекен - Юнтапа вăтам шкулĕнчи Екатерина Кудрявцева (кураторĕ - географи тата биологи вĕрентекенĕ, хушма пĕлÿ педагогĕ Эльвира Афанасьева) пулнă.

Пĕтĕм çĕнтерÿçĕпе кураторсене, çав шутра Екатерина Кудрявцевăпа Эльвира Петровна Афанасьевăна акцисен штабĕн регионти çĕнтерÿçин дипломĕсемпе, Раççей Федерацийĕн Патшалăх Думин вĕренÿ тата наука комитечĕн председателĕн пĕрремĕш çумĕн Геннадий Онищенкон Тав çырăвĕсемпе, çавăн пекех асăнмалăх парнесемпе чыс тунă.

А.КИРИЛЛОВА.